Malohi TKO Parker 'ia Nascimento

Malohi TKO Parker 'ia Nascimento

Kuo nga’unu ai pe ki mu’a ‘a e taleniti fuhu fakapalofesinale ‘o Joseph Parker ‘i he pongipongi ‘aneafi ‘i he’ene hoko ko e ki’i tangata Nu’u Sila fuhu pauni mamafa ‘i he’ene malohi ko ia ‘i ha fuhu takai fitu mo e tangata Pelesila ko ia ko Marcelo Nascimento ‘i Oberhausen, Siamane.

Ne pule kehea e Parker ‘a e ‘uluaki takai ‘e nima pea ne hao pe ‘i he takai hono ono hili ha toe lavetukia  ‘a e ‘uluaki lavea pe ne hoko ki hono mata to’ohema ki mu’a.

Na’e foki mai e takai fitu kuo puke ngata’a mo’oni ‘a Parker ‘o ne nafu ai ‘a e to’a Pelasila ‘o taufa holo ‘i he maea pea iku ki he fo’i TKO.

Na’e launga foki ‘a Nascimento ki he fakamaau ‘Aositelelia Brad Vocale ‘i hono ta’ofi ‘o e fuhu ka na’e ‘ikai ha ‘uhinga lelei he na’e ‘ikai ke ne toe lava ‘o malu’i e ngaahi tuki hema mo mata’u ‘a Parker.

Ko e ikuna ko ‘eni ‘a Parker ‘oku ne ma’u ai ha lekooti te’eki fo’i pea ne ikuna foki ‘a e leta ko ia WBA Pan-Asia ki he fuhu mamafa.

Kuo pehe ‘e he kau pule ‘o Parker te nau palani ha’ane toe fo’i fuhu ‘e tolu ki he ta’u neongo ‘oku mo’umo’ua ‘a e fokotu’utu’u fuhu pea na’a ngali ‘ikai lava kotoa, ka ‘e fakafalala kotoa ‘eni ha tu’unga matu’utamaki kuo ‘i ai ‘a e toe kafo ko ‘eni a hono mata’ilavea ki mu’a.  

Ko e fuhu fakapalofesinale ‘eni ‘a Parker hono valu pea ko e ‘uluaki ‘eni ‘i he mahina ‘e ono talu ‘ene to’o ‘a e taitolo ‘a Nu’u Sila meia Afa Tatupu a ia na’e matu’u ai pe foki ‘a hono kemo to’ohema ‘a ia ko e lavea motu’a tatau pe ne toe matu’u i he fuhu ko ‘eni.

Na’e hake ‘a e sitetiume sea ‘e 12,000 ko ‘eni ‘i Oberhausen, ‘i he fuhu ‘a Parker pea ‘i ai mo e ongo fuhu ‘e ua ki mu’a ‘i he fuhu hau ‘a Wladimir Klitschko mo e tangata Ha’amoa fanau’i ‘Aositelelia ko ia ko Alex Leapai. Na’e fo’i foki ‘a Lepai ia ‘ia Klitchiko.

Makehe mei he takai ono ‘a ia na’e lavea tukia ai ‘a Parker he ngaahi tuki ‘a Nascimento, na’a ne pule’i kotoa ‘e ia ‘a e toe ‘o e ngaahi takai.

Ko e  fuhu ko ‘eni ko e fua taim ia ke ‘ova atu ai e fuhu ‘a Parker ‘i he takai ‘e ono ka ne ‘ikai foki ha sio ia ‘e a’u ‘a e fuhu ni ki he taki 10.

Hili e kamata ne ‘ano lalo’i e Parker ‘a Nascimento ‘aki ha fo’i huka mata’u ‘i he  sekoni  ‘e 10 pea ‘osi ‘a e ‘uluaki takai. Na’e lava pe ‘a e Pelasila ‘o tu’u hake ‘i hono lau ‘e he fakamaau a e taimi.

Ko e takai ono ne ‘ano hapo ai ‘e Nascimento ‘a Parker ‘aki ha fu’u mata’u ne fetoto’i ai e telina hema ‘o e Kiwi mo ne ninimo. Na’e toe hope atu e fieta’a ‘a e Pelasila ‘o iku ki he toe matu’u ko ia ‘a e lavea motu’a ‘i he mata ‘o Parker. Kaekehe ko e mala’ia ia kia Nascimento ‘ene toe ‘oange ‘a e faingamalie ‘o Parker he ‘i he takai pe hono hoko na’e tuki pohu pe ia ‘e he Kiwi ‘o a’u ki he ‘oho a e fakamaau ‘o ta’ofi ‘a e fuhu pea talaki kuo TKO ai ‘a Nascimento.

Comments / Tālanga

comments

Powered by Facebook Comments

You must be logged in to post a comment Login